القرويون الجدد

كل مرة أقعد مع الدكتور في مارينا بعد منتصف اليل - طبعا مارينا هنا القهوة اللي في المندرة مش الساحل- نشوف الاسرة الصينية اياها ماسكين العوامات و رايحين البحر اخر مرة الدكتور قاللي بص تحس انهم فلاحين زى عندنا قرويين بيصيفوا. قلتلو يا دكتور هما الناس الصينيين دول قاعدين في مصر و بيشتغلوا ازاي ؟ فيزا عمل ديه يعني ولا ايه الحكاية؟ بعدين هو احنا ناقصين ما الناس هنا مش لاقيين شغل و طلعان عينهم و انا عارف انهم مش بيجيبو الحاجات اللي بيسوقوها معاهم من الصين , دول بيتعاملوا مع تجار مصريين و انا نفسي شفت معاهم حاجات صنع في مصر.

أنا مش عنصري و مش بأطالب بالخبز الفرنسي للشعب الفرنسي. بس دول العالم كلها بتكافح الهجرة الغير مشروعة و احنا و الحكومة تقولها علانية بنشجع الهجرة للخارج يبقى دلوقتي نسمح بهجرة الباعة الجائلين الينا؟

عموما الحاجات الغلط كتيير و الحاجات الصح بتقل . مش قادر أتخيل مصر بعد عشر سنين. أعتقد الفوضى حتزيد كتير و حنبقى رجعنا لعصور الفتن و القلاقل زي ما الكتب بتقول . و الله الفاسدين دول أغبيا أوي . يعني مش خايفين على عيالهم من الفوضى اللي حتحصل في البلد؟

في دكتور-مصري- بره عمل دراسة عن الحالة الاجتماعية في مصر. بيقول ثلثين الشعب حيعش حافي على الرعي بعد 50 سنة.

يدينا و يديكو طول العمر . أنا عايز أنام و أفصل شوية.

سعاد ماسي

كنت قررت أكتب عن الدوشة التي سبقت مجيء سعاد ماسي لاحياء حفلين في مصر واحد في القاهرة و واحد في الاسكندرية بس قلت استنى لبعد الحفل علشان أكتب انطباعي عن الحفل أيضا .

أول ما عرفت ان سعاد ماسي هتغني في مصر ما عرفتش ان في حفل في الاسكندرية كلمت أكرم قلتله يلا بينا على القاهرة يوم الخميس . قاللي يا عم حنحضر التلات هنا في اسكندرية و نوفر المشوار.

طبعا الحفل كان رائع موسيقى جميلة و ناس محترفة.

المهم الناس اللي قالوا قاطعوا سعاد علشان رايحة تغني في رام الله و تل أبيب نفسي أقوللهم قاطعوا الدنيا كلها و عيشوا في كهف . الدول العربية كلها عاملة تطبيع و تجارة و خلافه مع اسرائيل و انت عايز تقاطع واحدة بتمسك جيتار و تغني؟؟ أمال ما شفناش مظاهرة واحدة أيام اتفاق الكويز اللي هو تطبيع على أصوله .

هل تعلم أن جواز السفر الاسرائيلي لا يحتاج الى تأشيرة لدخول مصر عبر سيناء؟

بالمناسبة أنا ضد التطبيع و معارض قديم لاتفاقية سلام 79

أنا مع السلام , بس السلام بجد , سلام ناس عايزة تعيش مع بعض مش يعيشوا على حساب الاّخر.

يا ترى فيه حد بيقرى الكلام بتاعي ده؟ مافيش تعليقات يبقى ماحدش بيقرا الكلام . بس الكونتر بيقول غير كده . حد يعبرني حتى لو مش عاجبه كلامي :)

لقد تزوجت

اليوم يكون قد مرّ شهر منذ عقد قراني على زوجتي العزيزة, و أنتهز المناسبة لأعلن عن سعادتي بهذه الخطوة و عقبال عندكو جميعا.

كنت قاعد مع الدكتور برضو من شوية , الدكتور شايف ان الشعب المصري شكله وحش , بيقوللي ان ال Adams family genes منتشرة عندنا اويي

و أنا متفق مع الدكتور جدا ,بص على سحن الناس و انت ماشي و خاصة عساكر الأمن المركزي و انت تعرف انا بتكلم على ايه. اللهم لا اعتراض بس ليه سحن الشعب اللبناني و مش حقول السويدي مش زي عندنا؟

أنا مصري أبا عن جد بالمناسبة.

الشئ الأهم هو ان عقد قران أكرم يوم الخميس الجاى باذن الله , طبعا المعروف ان أكرم هو أقرب صديق لي الله يبارك عليكم يا عم أكرم و ما تنسناش في الوعد اللي وعدتهولنا من سنة!

أول تدوينة لى منذ 3 شهور يمكن أدون تاني كمان شهرين و يمكن بكرة , المهم ان الساعى 3 الصبح و انا لازم أصحى بدري أروح شغلي اللي اخنقت منه . مش عايز أشتغل عند حد.

مصر التي في خاطري

انفعل محمد عاطف -الدكتور- و هو يحدثني عن الشبه الكبير بين ملامح الانسان الصعيدي و ملامح المصريين القدماء التي نراها على أغطية التوابيت و التماثيل و أكد لي أننا -أهل المدن الشمالية- لسنا مصريين أصليين و لكننا نتاج انصهار المصريين مع الرومان و الاغريق و الهكسسوس و الفرس الخ.... قلت له و ان كانوا هؤلاء هم أصحاب هذه الحضارة العظيمة فلماذا هم الان غارقين في تأخر و قلة تعليم و ظروف معيشية قاسية بل أنهم مصدر النكات على المقاهي ليلا.

فأجابني هل ترى أن الدولة ترعيهم أدنى اهتمام بالتنمية؟ هل ترى عجلة التطوير و التعليم دائرة في جنوب مصر؟ بالطبع هى تكاد تكون معدومه في مدننا الكبيرة . و لكنها بالفعل معدومة بجنوب مصر. خاصة القرى.

الدكتر يصر أن المشكلة في مصر هي مشكلة تنمية و أنا أصر أن المشكلة هي مشكلة ادارة . ماحدش فاهم حاجة . و كان عندي مدرس عربي مفضل لدي اسمه خطاب كان دائما ما يقول لا تغررنك الاشكال و اللحى تسعة أعشار من تراه بقر.

فعلا تسعة أعشار من أراهم هم جهلاء أو أوغاد و مازلت أعيش بينهم و ربما كنت أحدهم.

سلام.

اولا

حسنا انتهيت لتوي من عمل المدونة.

لا يوجد شىء يقال.

سلام